1 Corinthians 7

Aɓonya Tu Mula Pa Tukwo

1Tu ɓenya tukwo, nfye ɓei nyami dna wasika nfye ɓo ka ga mi nyi, omi ɓe-gbedna nyi, ko bmiya lo nʼza to la nyikwo m. 2Ama mulapa gna bmiya lo, zanugbai doho-dohoi nwo nyikwo yi, nyikwoza doho-dohoi ce nwo ɓa yi, sakun fya kaya fi n laifi. 3Zanugbai ɓa ga wo nyikwo nyaho-nyahoi ko kunce dna mulapa nlonu ce nyikwoza nwo ɓa ʼba. 4Ɓinyikwoi nwo la senu, wo to nwo nayi iko yi lo n, sai dai owo ɓa; Njesun lonu, zanugbai to n wo nayi iko yi lo m, sai dai owo nyikwo. 5Ntucenu fye to wo aje nayi ɓi m. Sai dai n fysl zhin shiri deye ntuge fya zhin aduwa ntu esa fyewyi ɓo kawai. Ama n deye avun, fya je yeɓedo ntuge to fya kayafi n shetan jaraba ntu fyehin tna-wanshi ɓo.

6Mita da ge ko zhin tile nu ʼza pa mulam, ama oza ɓa mi wa pa nwo bugba la tu nu. 7A womi ngye zahozahoi fye mi wa gni ngye mi ntna mula pa yi. Ama yi to wu lo gmanyi-gmanyi num. Shekwoyi ga azaho nyaga mula-pa nya, ko mula-nyiko, azaho kuwa zhi-zhi lonu na gmada yi ntna mula-pa yi. 8Ntu cenu mi gna aza n ɓa ta lo mulam, ɓedo na nyigbai yi ko gna bmiya lo fya gyi abye lonu ntna mula-pa yi nfye ɓa mi, ngye mi. 9Ama ngye fye ta mi fya wan fyehin m, sai fya pa mula. Ntuge ko gna bmiya lo oza pa mula, ai ya gna wo gni woi fi da shakpe ɓo.

10To, ga aza n ɓa ku mula-pa nyi, mi gbetu yi lo, tuge shaula kawai m. Gbetu ye konyi emi nya nu to m, ntuge nya nyi n Dagayi ku da nwohin tukwoi, nyikwoza ta ya wo ɓam kpe-kpe. 11Amma n wa wo ya, to, wo la bwa gni lonu, to wa shan nu sen, akpe wa jeze lo da wo ɓa Zanugbai ce, wo ta ya wo nyikwo m kpe-kpe. 12Mi ye ma ɓe a shaula ho emihin anya. Ɓa to zhin gbetu nu n Dagayi aba cewom, ama ɓa bmiva lo nʼmi wyegye. N Yesu-viyi n nyikwoi dna lo n wo to zhin Yesuviyi m, ama nyikwo-yi laye wa sase woi, to, woto gna wa mim. 13Njesun ngye nyikwoza n ɓai lo n wo ta vi Yesu m, oɓa yi kwa wo la ye ntuge wa dna n woi, to, wo to gmi n wa ba m. 14Ntuge oɓa n wo ta vi Yesu m, owo nyikwo zhin wa gni wo ɓe cei vivi n Shekwoyi aba; n lonu nyikwo n wo ta vi Yesu m, owo ɓa zhin wa gni wo ɓe cei vivi n Shekwoyi aba To ɓei lo nu, to, oɓa ɓi ɓe ve ku ze; ngye a shetan da-ama she ko wu zhi lai nyi, ɓa Gyi-gyi-yi lo.

15To ama ngye oza nwo zhin tnaiviyi n cei pma lo na jegna yi, sai wa gnaje, ko to zhin abui num. Nkwa ze lonu, oho Yesu-viyi, to la gyitu ge sai oho puwada tnaviyi wa sase n ho yim; ntuge Shekwoyi ye Owa ɓi ɓa sase fi n bugba-fu nu n na gmada yi. 16Oho nyikwoza, ha kpe nʼwuna ge ho ɓa mi ha gni ho ɓa woi ya sase n ho ya? N lonu ce oho zanugbai ntu ho nyikwo ɓo.

17Zaho-zahoi wo gyi abye nwa sesei shi Shekwoyi cei pma, dna mula-pa ko tna-mula-pa, shi Shekwoyi wa wu zokwo n wo bma zhin yi, la gni aba doho-dohoi Shekwoyi wa yi ho gni. Deye konu zhin oɓo mi wu na ikklisiya vinya.

18Oza wo ku a Yahudiyi knunu vi nu kpa kaciya zhin nya-kafin wo vi Yesu, ko to ze wo bugba kni nyam, oza wo to zhin kaciya yim, wo to shan zhin m. 19Ntuge knunu kaciya zhin nya, ntna kaciya zhin yi, ɓa to zhin nyaho nu m. Ama oɓo dnagmai konu zhin oza vi Shekwoyi ɓeye woi shi Wa wyidna bwa. Oɓo kpakalai nu.

20Kwo bmiya zaho-zahoi wa gyabye nwo tnu-tnu-yi n Shekwoyi ɓei yi wo, woi dna ko zhin mi. 21Ho zhin fyenu nu? To ye kwa wun ho bugbam-to ama, n wyegye-a gu ho ya ha bwa hohin tukwo, zhan-pma kwoi. 22N Dagayi wa yi ho hoi zhin fyenu tnu-tnu nu, pa ge Kristi la ho loya n iko laifi nya; oho na yi ho n pma loloi ya, pa ge ho la ze Kristi fyenu. 23Kristi ɓei la fye si n konantuce nu fye la loya n nanyi ye tukwo-mwa nɓa dnawo yi. 24Ntu cenu, oma-zaje yeye-yi, aba nʼza vi Yesu woi gni nɓa, wo la gni ɓo, ntuge n saiye Dagayi gni lo ɓo Wa bma wo zhin. 25Nsaiye miɓa dna fye gbe tu ɓenya deyi tukwo. Aɓi anyikwoi n ɓa to sanu nyim ma? A fa ɓa ɓa sanu? Mi to n gbetu yi lo n ko gmi n Dagayi aba ntu ɓa ɓom. Ama Dagayi la awyega gami dna Wo sun-sun-gye nkwo kunce lo a gami gaiciya, ko ɓa damagma ma gna fye ɓo mi zhin nubo lo cei.

26Wahala yi nu nyi; eyi a Yesuviyi eya wye-wyei fi lo na zhin gye mi n saiye. Dna saye pya kuwa mi gye lo ngye ko gna bmiya lo oza gni lonu ntna mula-pa yi. 27To, ama, nho ku mula lupa, to gna-kwaje m. Nho to pan, to gya-wyeya da ce n saiye m. 28Ofye anugbai, nfye cei pma lo fya gyabye na nyikwo kuyi nsaiye, ɓenukwoi nu tom; Ko ɓinyikwoi senu dna saye pya, abui nu ton. Ama ce, mula pa ɓa ɓe a wahala ɓeɓe nu n mi to ɓo cei pma fya sin ɓa n saiye m.

29Oma-zaje nya mida nyi, esa ta shan sun lon n mwam, nlonu, esa yi gba kpekpe-gye lo ntu Shekwoyi tnu-tnu ɓo. N tuce nu, oza n wo nyikwoi dnalo, wo la ze ngye woto i cei lo m, ntu Dagayi tnu-tnu ɓo. 30Agmada, ko bugba-wun, ko nyabwa, ɓa to go zaho-zahoi Shekwoyi tnu-tnu yam. 31Aza nɓa zhin tnu-tnu na kaya anyi nya yi, ɓa zhanpma ɓai dna zokwo manayi, ɓai ye nʼsai bwa. Ntuge anyi nɓa shi n saiye nyi, esa fyewyi, ɓa ɓa duya.

32Nyaho-nyahoi fye ɓa zhin, mi to cei pma lo zaha zhin ko dna na ɓesam. Oza wo to nyikwoi dnam, wo ɓa mi wa zhin apma nwo sayi woi zhin Dagayi tnu-tnu, she kwo ɓa da Dagayi. 33Ama oza wo nyikwoi dna, wo ta mi wa zhin lonu dei-dei m, tile wa zhin anyiɓo-nubo i oɓo nwo ɓa zhin ntu ge kwa da wo nyikwo. 34Owo aɓopuawo n gnaje lo. Ɓinyikwoi nwa senu ce, oɓo gmanyi-gmanyi nu bwa wo sun. Ɓinyikoi wo to senun, owo ɓo pua-wonu wa zhin ɓo nkwo ɓa da Dagayi-dna ɓeho-ɓehoi wo ɓa zhin. Ama nyikwo nusei tile nu wa zhin aɓo-aje nubo, shi wo ɓa zhin wo puwa aba, shi wo ɓa zhin oɓo nkwo ʼɓa da wo ɓa.

35Mi gna fye ɓeye ntuge ma bmafye zhin nu, toge ma kma fye mula-pam. Ama mi cei pma fya ga fyehin tukwo dna Shekwoyi tnu-tnu vinya, ntna ɓo ko ɓa gna fya bugbajeya. 36Oza wo ta mi lo n wohin wan m, woi gyelo wo ɓa pa mula nu, to wo gyabye pai, abui nu to m. 37Ama n zanugbai ho lo nwo ɓa mi wa tu wohin gbe nge wo ta la nyikwo m, har wa ku mi wa gni lonu ntna nyikwo layi, woi go wohin wan-fi, wo ku shaula manayi zhin! 38Ntucenu oza wa pa mula wo ku zhin bmiya, ama oza wo to pa mula m, wo ku zhin gna bmiya.

39Nyikwo-nusei dna nwo ɓa akun nu, esa nwo ye n wye-wyei lo; ama sa nwo ʼɓa fi cei, to wo la loya nwa wun, wo ɓa mi wa senu do n wo cei pma, ama sai onu wo zhin Yesu viyi ce. 40Ama wo ɓa gna agmada bwa woi ya gni lonu, n mi wyegye nu; ama mi gye lo ngye Shekwoyi Zafun kunsun lo miyi n mi shaula n mi gafye nyi.